حين تتكلم تعز

قالوا لهم: لا تنزلوش

أذان صماء، ما يسمعوش

تضاحكوا، قالوا سوى

سوى تعز، فته رشوش

زادوا نخيط، الصوت علوا، قلنا لهم شوفوا

الطريق عوجى، ماهيش سوى

وأنتم طول الزمان ما تفهموش

تعز عز المكان، عزة نفوس

عند النزال، صنعاء تقول: عبدالرقيب

مثله مافيش، وانت مكانك مودف

تحلف إيمان يمين، تكذب

عودوك على ضرب الصميل، وانت على غيرك زعيط معيط

لوك سرك، رخصت دماء أهل البلاد

علمك دخن، من علمك، عقله ريوس، فطيس

كثير قالوا لكم: لا تنزلوش، ركبت راسك

شفت كيف؟ بالسائلة

كيف شقدفوك، كيف؟

سنتفوك

قد قلت لك: بطل تهنجم، عليت صوتك

صوتك ركيك، هنجمة فاشوش

بسوق المعارك، ما تمترطش حتى بلاش

وانت مكانك مكور، ما تدعسش بريك

تلعن ابوها تعز

قد قالكم عبد الرقيب، وبعده عدنان قلكم: ما تنزلوش

فهمك بطئ، مليان غنج

من حق زمان تطرم طريم، ترمي حجر من قاع اليهود

لذي سفال وعريتها حتى يريم، مربوش

نسيت قبل الصلاة حتى الوضو

قد قلت لك: تعز، صنعاء، زبيد

رجال تدق الحديد، رح أسأل بني حشيش

وعادك اسال ميدان سبعين يوم النزال عن الرجال

رجال، كل اليمن

يوم الحصار، دقوا الحديد، فلقوا الجبال

حينها ولت فلول البدر خلف الحدود

وانت مكانك فشر، وانت مكانك نقامر بدم الرجال

مكانك مودف، ضيعت طريقك والسبيل

تقول كلام فاشوش، كلام بالسوق، ما يسوى حتى ريال

قد قالوا لكم: لا تنزلوش لتعز

تعز جبل عالي، لا تقل خولان الطيال

وايش فهم الجاهل؟

قالوا لكم: لا تنزلوش، تعز حبيش

حرف سفيان، حرف

بلاد الروس، اخوه من زمان، إخوة مواطن وطن

وانت مكانك نخيط، نخيط

يا حسرة الدهر، كم ضيعتم بلاد

ايش اقولك، ايش اقول

فهمك بطىء، ايش فهمك، غير الصميل

تعز تقول: لا تنزلوش

قد قلكم عبد الرقيب، قولة رجال، لا تنزلوش

لا تنزلووووش